நீலக𑌼ிரி ஜில்லாவெ𑌼ல் சார்ம்ப𑌼ேரெ𑌼 அம்ப𑌼ெ𑌼 ஒன் ஜாக𑌼ி அவொட𑌼ெ𑌼த𑌼ெ𑌼. ஆ ஜாக𑌼ெ𑌼ல் ஒன் த𑌼ப்பெ𑌼 பெ𑌼ய்ர்க𑌼ாட𑌼ெ𑌼 அவொட𑌼ெ𑌼த𑌼ெ𑌼. ஆ பெ𑌼ய்ர்க𑌼ாட்ல் சுமார் யான்க𑌼ெ𑌼 இத𑌼ொட்டெ𑌼க𑌼ெ𑌼. அதெ𑌼ருன்ல் தன்ன எ𑌼ட𑌼்ட𑌼ு யான்க𑌼ெ𑌼 இத𑌼ெ𑌼க𑌼ெ𑌼. ஆ எ𑌼ட𑌼்ட𑌼ு யான்க𑌼ெ𑌼 ஜொத் யான்க𑌼ெ𑌼 தானு. என்னு நோட𑌼்சனிகிரி அக𑌼ெ𑌼 எ𑌼ட𑌼்ட𑌼ாளு தானு ஒன்ட𑌼ய இத𑌼ொட்டெ𑌼க𑌼ெ𑌼. அன் இக𑌼ெ𑌼 எ𑌼ட𑌼்ட𑌼ாமெ𑌼ங சார்ம்ப𑌼ேர்ல் இப்பெ𑌼 பாரெ𑌼ட்டொட𑌼ெ𑌼க𑌼ெ𑌼 ப்யாரெ𑌼 உட்டெ𑌼க𑌼ெ𑌼. அல்லி ஒன்ட𑌼ாமெ𑌼ன் ப்யாரெ𑌼 சீனிவாசன் தானு. இனொன்ட𑌼ாமெ𑌼ன் ப்யாரெ𑌼 சங்க𑌼ரெ𑌼 அம்ப𑌼ெ𑌼 கட்ட ப𑌼ொம்மெ𑌼ன் தானு. ஆ த𑌼ப்பெ𑌼 பெ𑌼ய்ர்க𑌼ாட்ல இக𑌼ெ𑌼 எ𑌼ட𑌼்ட𑌼ாளு ஒன்ட𑌼ய தானு தீனி தின்னு இத𑌼ொட்டெ𑌼க𑌼ெ𑌼. அத𑌼ங்க𑌼ி இப்பெ𑌼ன் ஒன்டெ𑌼 ஈ யான்க𑌼ெ𑌼 எ𑌼ர்லுஙாசினி ஈர்ல்லா போக𑌼ெ𑌼ல் தொட𑌼ெ𑌼க𑌼ெ𑌼செ𑌼க𑌼ெ𑌼. அத𑌼ங்க𑌼ி ஈர்ல்ல இப்பெ𑌼 மெ𑌼த்திர்ல பெ𑌼ய்ட்டு ஜனக𑌼ெ𑌼 நட்னிப்பெ𑌼 ப𑌼ாள்க𑌼ெ𑌼ர்ன பின தக்காய்க𑌼ெ𑌼ர்ன ஒட்டய தின்ட𑌼ொட்டெ𑌼க𑌼ெ𑌼. அன் ஆ மெ𑌼த்திர்ல் இப்பெ𑌼 ஜனக𑌼ெ𑌼 யான்க𑌼ெ𑌼ர்ன அட்டெ𑌼சானி, யான்க𑌼ெ𑌼 ஈட்டு மன்செ𑌼ன்ட𑌼ெ𑌼ர்ன அய்ட்டொடெ𑌼க𑌼ெ𑌼. அன் அதங்க𑌼ி இப்பெ𑌼 சமித்தெ𑌼ல் ஜனக𑌼ெ𑌼 பாரெ𑌼ட்டொட𑌼ெ𑌼த்தெ𑌼ர்கா போனெ𑌼 யார்த்தெ𑌼னு பெ𑌼த𑌼ொட்டெ𑌼க𑌼ெ𑌼. அன் பாரெ𑌼ட்டொட𑌼ெ𑌼க𑌼ெ𑌼 ப𑌼ான்ட்டு ஈர்ப𑌼ெ𑌼ய்லியா பெ𑌼ய்ட்டு யான்க𑌼ெ𑌼ர்ன அய்ன்கத𑌼ொட்டெ𑌼க𑌼ெ𑌼. அத𑌼ங்க𑌼ி ஈர்ப𑌼ெ𑌼ய்லிய பெ𑌼ய்யொட்டெ𑌼 யான்க𑌼ெ𑌼, ஒன்டெ𑌼 மன்செ𑌼ட𑌼ெ𑌼ர்ன க்யன்க𑌼ாலயெ𑌼 தொட𑌼ெ𑌼ங்க𑌼ெ𑌼செ𑌼க𑌼ெ𑌼. அன் ஆ ஈர்ல் இத𑌼ெ𑌼 மன்செ𑌼ன்ட𑌼ெ𑌼 ஒப்பாத்தாசனி சப்பாங்க𑌼ி பொருமி ப𑌼ுப்பெ𑌼லெ𑌼மு. கீர்ல்ல தன்ன இத𑌼ொட்டெ𑌼க𑌼ெ𑌼. அத𑌼ங்க𑌼ி இப்பெ𑌼ன் கிரி யான்க𑌼ெ𑌼 ஜனக𑌼ெ𑌼ர்ன ப𑌼ுட்டத𑌼ொட்லு. எ𑌼ர்லுஙாசனி மெ𑌼த்திர்ல பெ𑌼ய்ட்டு ஜனக𑌼ெ𑌼 இப்பெ𑌼 கீர்க𑌼ெ𑌼ட𑌼்ன பிர்சாத𑌼ொட்டெ𑌼க𑌼ெ𑌼. அதங்கிஜெ𑌼னு ஈ யான்க𑌼ெ𑌼 பின் மன்செ𑌼ன்ட𑌼ெ𑌼ர்ன க்யன்க𑌼ாத𑌼ொட்டெ𑌼க𑌼ெ𑌼. அன் சார்ம்ப𑌼ேரெ𑌼 இப்பெ𑌼 பாரெ𑌼ட்டொட𑌼ெ𑌼க𑌼ெ𑌼 ஈ யான்க𑌼ெ𑌼ர் புட𑌼்செ𑌼னு த்யப்பெ𑌼க𑌼ாட𑌼ெ𑌼 யான்க𑌼ெ𑌼ர்ன தாட்டெ𑌼 ஜாக்கா எ𑌼ட்னு போப்க்கா பெ𑌼ய்ரி சர்கார்க்கா கக𑌼ாஜி ப𑌼ெர்னு கொட்டெ𑌼க𑌼ெ𑌼. அன் சர்கார்ல் இத𑌼ெ𑌼னு ஈ எ𑌼ட𑌼்ட𑌼ு யான்க𑌼ெ𑌼ர்ன புய்ர்க்கா பெ𑌼த𑌼ெ𑌼க𑌼ெ𑌼. அன் 2016 அம்ப𑌼ெ𑌼 எர்செ𑌼ல் கும்கி யான்க𑌼ெ𑌼ர்ன தாட்டெ𑌼 ஆத𑌼ிவாசி ஜனக𑌼ெ𑌼 த்யப்பெ𑌼க𑌼ாட𑌼ெ𑌼ல் இத𑌼ெ𑌼னு கும்கி யான்க𑌼ெ𑌼ர்ன குய்ட்னு இப்பாத்தெ𑌼ட்டெ𑌼 அம்ப𑌼ெ𑌼 ஜாக்கா ப𑌼ன்ட𑌼ெ𑌼க𑌼ெ𑌼. ஆங் ப𑌼ான்ட்டு கும்கி யான்க𑌼ெ𑌼, பாரெ𑌼ட்டொட𑌼ெ𑌼க𑌼ெ𑌼 பின கும்கி யானோட𑌼ெ𑌼 மன்செ𑌼ட𑌼ெ𑌼 ஒட்டயாளு சே𑌼ர்ஜெ𑌼னு ஈ எ𑌼ட𑌼்ட𑌼ு யான்க𑌼ெ𑌼ர்ன புட𑌼்லாயெ𑌼 பெ𑌼ய்ர்க𑌼ாட்ல பே𑌼செ𑌼க𑌼ெ𑌼. ஆ எ𑌼ட𑌼்ட𑌼ு யான்க𑌼ெ𑌼 இத𑌼ெ𑌼க𑌼ெ𑌼 ப𑌼ான்ட்டு ஏல்செ𑌼ன் அங்க𑌼ாய்ர் ப𑌼ிர்க்கெ𑌼ல் இப்பெ𑌼 பெ𑌼ய்ர்க𑌼ாட்ல் தானு இத𑌼ெ𑌼க𑌼ெ𑌼. அன் இக𑌼ெ𑌼 ஒட்டயாளு ஆ பெ𑌼யர்க𑌼ாட்க்கா தானு யான்க𑌼ெ𑌼ர்ன தாரேத்தெ𑌼னு பே𑌼செ𑌼க𑌼ெ𑌼. ஆங்க𑌼ி அக𑌼ெ𑌼 ஒட்டயாளு பெ𑌼ய்ட்டு பெ𑌼ய்ர்க𑌼ாட்ல் யான்க𑌼ெ𑌼ர்ன கன்ட𑌼ெ𑌼க𑌼ெ𑌼. அன் ஆ எ𑌼ட𑌼்ட𑌼ு யான்க𑌼ெ𑌼 பெ𑌼ய்ர்க𑌼ாட்ல் தீனி தின்ட𑌼ித𑌼ெ𑌼க𑌼ெ𑌼. அன் யானி புட𑌼்லாயெ𑌼 பெ𑌼ய்னிப்பாள்க𑌼ெ𑌼 கும்கி யான் ப𑌼ென்த்தெ𑌼ல் பாரெ𑌼ட்டொட𑌼ெ𑌼க𑌼ெ𑌼 ஏர்னு மண் துர்க𑌼ெ𑌼 ஜூஜிய எ𑌼ட்னு சீனிவாசெ𑌼ன் அம்ப𑌼ெ𑌼 யானிய எத்தெ𑌼செ𑌼க𑌼ெ𑌼. அன் சீனிவாசன் அம்ப𑌼ெ𑌼 யானி மண் திர்க𑌼ெ𑌼னு தாள் ப𑌼ுத𑌼்த𑌼ெ𑌼த𑌼ெ𑌼. அன் சங்க𑌼ரெ𑌼 யானி அல்லித𑌼ெ𑌼னு எ𑌼ட்ன்க𑌼ாட்டு ஓட𑌼்செ𑌼த𑌼ெ𑌼. அன் இத்தெ𑌼ர்க்கா சங்க𑌼ரெ𑌼 அம்ப𑌼ெ𑌼 கட்டப𑌼ொம்மெ𑌼ன் அம்ப𑌼ெ𑌼 யானிய புட𑌼்லாயெ𑌼 ஆசெ𑌼ல. பின பாரெ𑌼ட்டொட𑌼ெ𑌼க𑌼ெ𑌼 சீனிவாசன் யனிய ப𑌼ெ𑌼ய்ண்ல் ஏட்னு த்யப்பெ𑌼க𑌼ாட𑌼ெ𑌼ங குய்ட்னு பே𑌼செ𑌼க𑌼ெ𑌼. ஆ யானி குய்ட்னு பெ𑌼ய்ட்டு எ𑌼ட𑌼்ட𑌼ு எர்ஜெ𑌼க𑌼ெ𑌼னு கும்கி யன்க்கா இப்பெ𑌼 ப𑌼ித்தியமா ஈ சீனிவாசன் யான்க்கா மன்செ𑌼ன்ட𑌼ெ𑌼 க்யல்பெ𑌼செ𑌼செ𑌼க𑌼ெ𑌼. பின சீனிவாசன் யானி கும்கி யானி ஆசெ𑌼த𑌼ெ𑌼.
சீனிவாசன் யனியா புட𑌼்செ𑌼னு எ𑌼ட்னு பே𑌼செ𑌼ஙா, சங்க𑌼ர் யானி எப𑌼ெ𑌼னு ஆசெ𑌼த𑌼ெ𑌼. அன் சங்க𑌼ர் யானி எட்டெ𑌼 யான்க𑌼ெ𑌼 உன்ல சே𑌼ர்ஜொட்லா. எப𑌼ெ𑌼ன் தன்ன இத𑌼ொட்டெ𑌼ட𑌼ெ𑌼. பின கிரி சங்க𑌼ர் யானி மன்செ𑌼டன்ட𑌼ெ𑌼ர்ன க்யன்க𑌼த𑌼ொட்டெ𑌼த𑌼ெ𑌼. அங்தானு 2021 ல் ஒன்டெ𑌼 சங்க𑌼ர் யானி ஒப்பாத்தெ𑌼ன் சமித்தெ𑌼ல் ஒன்ட𑌼ே நட𑌼ெ𑌼த்தெ𑌼ல் அம்மெ𑌼ன் மங்ஙெ𑌼னு எ𑌼ட𑌼்ட𑌼ாமெ𑌼ன க்யன்க𑌼த𑌼்த𑌼ெ𑌼. அக𑌼ெ𑌼 எ𑌼ட𑌼்ட𑌼ாமெ𑌼ன யானி க்யன்க𑌼த𑌼ெ𑌼ஙா ஈர்ல் இப்பெ𑌼 மன்செ𑌼ன்ட𑌼ெ𑌼 சர்கார்க்கா ஈ யானி புய்ர்க்கா பெ𑌼த𑌼ெ𑌼க𑌼ெ𑌼. அன் த்யப்பெ𑌼க𑌼ாட𑌼ெ𑌼ல் இத𑌼ெ𑌼னு கும்கி யான்க𑌼ெ𑌼ர்ன குய்ட்னு ப𑌼ான்ட்டு கொப்பய்லெ𑌼 இப்பெ𑌼 ஒன் பெ𑌼ய்ர்க𑌼ாட்ல் எ𑌼ட்செ𑌼னு சங்க𑌼ர் அம்ப𑌼ெ𑌼 கட்டப𑌼ொம்மெ𑌼ன் யானிய 2021 ல் பாரெ𑌼ட்டொட𑌼ெ𑌼க𑌼ெ𑌼 புட𑌼்செ𑌼க𑌼ெ𑌼. ஆ யானி த்யப்பெ𑌼க𑌼ாட𑌼ெ𑌼க்கா குய்ட்னு பெ𑌼ய்ட்டு எ𑌼ட𑌼்ட𑌼ு எர்ஜெ𑌼க𑌼ெ𑌼னு கும்கி யன்க்கா இப்பெ𑌼 ப𑌼ித்தியமா ஈ சங்க𑌼ர் அம்ப𑌼ெ𑌼 கட்டப𑌼ொம்மெ𑌼ன் யான்க்கா க்யல்பெ𑌼செ𑌼செ𑌼க𑌼ெ𑌼. பின சங்க𑌼ர் அம்ப𑌼ெ𑌼 கட்டப𑌼ொம்மெ𑌼ன் யானி கும்கி யானி ஆசெ𑌼த𑌼ெ𑌼. ஏ𑌼ய்த𑌼ு எர்ஜி கல்ஜெ𑌼னு ஈ எ𑌼ட𑌼்ட𑌼ு ஜொத் யன்க𑌼ெ𑌼 பின ஒன்ட𑌼ய சே𑌼ர்ஜெ𑌼க𑌼ெ𑌼. இன நீலக𑌼ிரி ஜில்லாவெ𑌼ல் குட𑌼்லாரெ𑌼 சுமார் யான்க𑌼ெ𑌼 அவொட𑌼ெ𑌼க𑌼ெ𑌼. ஈ யான்க𑌼ெ𑌼 ஈர்ப𑌼ெ𑌼ய்லிய பெ𑌼ய்ட்டு மன்செ𑌼ர்ன அட்டெ𑌼க𑌼ெ𑌼. பின மன்செ𑌼ன்ட𑌼ெ𑌼 நட்னிப்பெ𑌼 மொத𑌼ெ𑌼ல்க𑌼ெ𑌼ர்ன தீத்தாய மாட𑌼ெ𑌼க𑌼ெ𑌼. அன் சீனிவாசெ𑌼ன் சங்க𑌼ர் யான்க𑌼ெ𑌼 எ𑌼ட𑌼்ட𑌼ாளு தானு ஈ பெ𑌼ய்ர்க𑌼ாட்ல இப்பெ𑌼 யான்க𑌼ெ𑌼ர்ன அட்லாயெ𑌼 ப𑌼ுப்பெ𑌼க𑌼ெ𑌼. ஈங்தானு இக𑌼ெ𑌼 எ𑌼ட𑌼்ட𑌼ு யான்க𑌼ெ𑌼 இன ஒன்ட𑌼ய அவொட𑌼ெ𑌼க𑌼ெ𑌼.
இன் பெ𑌼த𑌼ெ𑌼னாட𑌼ெ𑌼 காய்ரிக𑌼ெ𑌼