மேதி அம்ப𑌼ெ𑌼 பெ𑌼ணாக்கெ𑌼ன் ப𑌼ாளெ𑌼 கத𑌼ி
ஒன்ட𑌼ெ𑌼 ஈர்ல் ஒன் மெ𑌼த்திரி ஒன்ட𑌼ெ𑌼 பட்டெ𑌼த𑌼ெ𑌼. ஆ மெ𑌼த்திர்ல் மேத𑌼ி அன்பெ𑌼னு ஒன்ட𑌼ெ𑌼 உட𑌼்க𑌼ித்தி இத𑌼்த𑌼ெ𑌼. மேத𑌼ி உட்டாசெ𑌼 ஜாக𑌼ி ப𑌼ெ𑌼ய்ணாட்ல் இப்பெ𑌼 நாய்க்கட் மெ𑌼த்திர்ல் தானு உட்டாசெ𑌼த𑌼ெ𑌼. மேத𑌼ி ஸ்கோல்க்கா பே𑌼செ𑌼த𑌼ிலா. மேத𑌼ி ப𑌼ெ𑌼லயா உட்டாசெ𑌼க𑌼ாளெ𑌼 எ𑌼ட்டாளு தானு. நாக்காளு க𑌼ெ𑌼ணெ𑌼 மக்கெ𑌼, நாக்காளு பெ𑌼ணாக்கெ𑌼ன் மக்கெ𑌼 தானு. மேத𑌼ி தங்க𑌼ப𑌼்ப𑌼ி கீர்ல் தானு இத𑌼ொட்டெ𑌼த𑌼ெ𑌼. தங்க𑌼ம்மெ𑌼ன் மறி பெ𑌼ன்டெ𑌼ணு, சீம்ப𑌼ெ𑌼 ஒர்த்தெ𑌼னு, அங்க𑌼ாய்ர்த்தெ𑌼லா மெரோட்டெ𑌼த𑌼ெ𑌼. மேத𑌼ிக𑌼ெ𑌼 ப𑌼ாள் பாட𑌼ெ𑌼 பட்னு தானு த𑌼ப்பய்னாட𑌼ெ𑌼க𑌼ெ𑌼. கிரிசெ𑌼ன்ட𑌼ெ𑌼 இப்பெ𑌼னிசிரி தின்லாயெ𑌼 இக்கி இல்கெ𑌼ன், பெ𑌼ய்ர்க𑌼ாட்லா பெ𑌼ய்ட்டு, க்யாமொளிய எ𑌼ட்னு ப𑌼ாண்ட்டு, ப𑌼்யாவெ𑌼செ𑌼னு தின்ட𑌼ொட்டெ𑌼க𑌼ெ𑌼. பின மேத𑌼ிக்கா பானாக்கு வொய்செ𑌼 இப்பெ𑌼ன் த்யனம்ப𑌼்யாரெ𑌼 மெ𑌼த்திர்ல் இப்பெ𑌼 கிர்மாற்ன் அம்ப𑌼ெ𑌼 மன்செ𑌼ஙா மத𑌼ெ𑌼வெ𑌼 மாய்ர்னு கொட்டெ𑌼க𑌼ெ𑌼. அத𑌼ங்க𑌼ி மத𑌼ெ𑌼வெ𑌼 ஆய்னு மேத𑌼ிக்கா மூறு மக்கெ𑌼 உட்டாசெ𑌼க𑌼ெ𑌼. மூறு மக்கெ𑌼 க𑌼ெ𑌼ணெ𑌼 மக்கெ𑌼 தானு. அக𑌼ெ𑌼 மூறாமெ𑌼ஙா மத𑌼ெ𑌼வெ𑌼 ஆசெ𑌼த𑌼ெ𑌼. மேத𑌼ி பின தன் க𑌼ெ𑌼ண்ட𑌼ாளெ𑌼 எ𑌼ட𑌼்ட𑌼ாளு கூய்லி பெ𑌼ய்ணிக்கா தானு பெ𑌼ய்யோட𑌼ெ𑌼க𑌼ெ𑌼. மேத𑌼ி தன் அம்மெ𑌼ன் செ𑌼த்தெ𑌼னே𑌼ய்னு பத்து எர்ஜிக𑌼ுனு ஆசெ𑌼த𑌼ெ𑌼. மேத𑌼ி தங்க𑌼ப𑌼்ப𑌼ி நாய்க்கட்டெ𑌼 மெ𑌼த்திர்ல் அவொட𑌼ெ𑌼த𑌼ெ𑌼. இன மேத𑌼ிக்கா எ𑌼ய்யாத𑌼்த𑌼ெ𑌼ட𑌼்ட𑌼ு வொய்செ𑌼 ஆசெ𑌼த𑌼ெ𑌼. மேத𑌼ி தன் க𑌼ெ𑌼ண்ட𑌼ாள்க்கா எ𑌼ய்யாத்தாறு வொய்செ𑌼 ஆசி. இக𑌼ெ𑌼ட𑌼்ட𑌼ாளு இன பெ𑌼ய்ணியெ𑌼 கிஜெ𑌼னு ப𑌼ாள்த𑌼ெ𑌼னு அவொட𑌼ெ𑌼க𑌼ெ𑌼.
இன் பெ𑌼த𑌼ெ𑌼னாட𑌼ெ𑌼 காய்ரிக𑌼ெ𑌼