ஒன்ட𑌼ெ𑌼 ஈட𑌼்ல் ஆறு ஆண் கெ𑌼ரெ𑌼ண்ட𑌼ெ𑌼 இத𑌼ெ𑌼க𑌼ெ𑌼. அத𑌼ெ𑌼ர்க்க ஒன் கெ𑌼ராளெ𑌼 இத𑌼்த𑌼ெ𑌼. தன் அண்ன்ட𑌼ெ𑌼 எ𑌼ர்க𑌼ித𑌼ெ𑌼ஙா பெ𑌼ய்னியெ𑌼 கீல்லுஙா ப𑌼ெ𑌼ரி கத𑌼்க்க போப்பெ𑌼க𑌼ெ𑌼. பின கெ𑌼ராளெ𑌼 அதெ𑌼ர்க்க நிச்செ𑌼 அட்னு எ𑌼ட்னு போப்பெ𑌼த𑌼ெ𑌼. அத𑌼ெ𑌼 போப்பெ𑌼 ப𑌼ட்ல் பிலியெ𑌼 ஒன்ட𑌼ெ𑌼 இப்பெ𑌼த𑌼ெ𑌼. பிலியெ𑌼 உட𑌼்க𑌼ித்தொட𑌼 யன்க்க நிச்செ𑌼 எ𑌼ட்னு ப𑌼ன்ளலி அன்பெ𑌼னு கே𑌼ட்டெ𑌼த𑌼ெ𑌼. அன் உட𑌼்க𑌼ித்தி பெ𑌼த𑌼்த𑌼ெ𑌼 நின்க்க நவெ𑌼 நிச்செ𑌼 அட்னு எ𑌼ட்னு ப𑌼ன்லனி,கேக்ஙா ப𑌼ுப்பெ𑌼ன் நின்க்க சேர்ச்செ𑌼னு நிச்செ𑌼 எ𑌼ட்னு ப𑌼ுப்பெ𑌼னி அன்பெ𑌼னு பிலியொட𑌼 உட𑌼்க𑌼ித்தி பெ𑌼த𑌼்த𑌼ெ𑌼. அல்க்க பிலியெ𑌼 , சிரிமி அன்பெ𑌼னு பெ𑌼தாட்டு நிய்யெ𑌼 பீக𑌼ே அன்பெ𑌼னு பெ𑌼த𑌼்த𑌼ெ𑌼. பின உட𑌼்க𑌼ித்தி கத𑌼்க்க பெ𑌼ய்ட்டு தன் அண்ட𑌼ெ𑌼ர்க்க நிச்செ𑌼 எ𑌼ட்ன் பெ𑌼ய்ட்டு கொட்டாட்டு பின கீர்க்க எ𑌼ட்ன்காட்டு பே𑌼செ𑌼த𑌼ெ𑌼. பின பின்பெ𑌼 நாளெ𑌼 மத𑌼ன்க்க கெ𑌼ராளெ𑌼 தன் அண்ட𑌼ெ𑌼ர்க்க நிச்செ𑌼 எ𑌼ட்னு பே𑌼செ𑌼த𑌼ெ𑌼. அன் அப𑌼் ப𑌼ட்ல் பிலியெ𑌼 இத𑌼்த𑌼ெ𑌼. பின பிலியெ𑌼 உட𑌼்க𑌼ித்தொட𑌼 இன்ட𑌼ெ𑌼 யன்க்க நிச்செ𑌼 எ𑌼ட்னு ப𑌼ன்ட𑌼ெ𑌼த𑌼ெ𑌼 அன்பெ𑌼னு கே𑌼ட்டெ𑌼த𑌼ெ𑌼. அன் உட𑌼்க𑌼ித்தி இலமா எ𑌼ன்ட𑌼ெ𑌼த𑌼ெ𑌼. அன் பிலியெ𑌼 சொடியெ𑌼 எ𑌼ல்க𑌼ெ𑌼னு உட𑌼்க𑌼ித்திய மத𑌼ு மாட𑌼்லுஙா பிலியெ𑌼 இப்பெ𑌼 அளோக்க குய்ட்னு பே𑌼செ𑌼த𑌼ெ𑌼. ஆ உட𑌼்க𑌼ித்திய குய்ட்னு போப்பெ𑌼 ப𑌼ட்ல் உட𑌼்க𑌼ித்தி தன் அண்ட𑌼ெ𑌼ர்க்க எ𑌼ட்னு போக𑌼ெ𑌼ல்லயெ𑌼 எ𑌼ட்செ𑌼னிப்பெ𑌼 நிச்செ𑌼 ஒக்கோப்பெ𑌼த𑌼ெ𑌼. பின அத𑌼ெ𑌼 உட்னிப்பெ𑌼 தீரிய கிரிக𑌼ா கிர்கக𑌼ாணு தன் அண்ட𑌼ெ க𑌼ொத் மாட𑌼்லுஙா ப𑌼ெ𑌼ரி ஆ ப𑌼ட்ல்ல உட்னிப்பெ𑌼த𑌼ெ𑌼. பின பிலியெ𑌼 உட𑌼்க𑌼ித்திய அத𑌼ெ𑌼 இப்பெ𑌼 அளோக்க குய்ட்னு பே𑌼செ𑌼த𑌼ெ𑌼. பின உட𑌼்க𑌼ித்திய தன்அண்ட𑌼ெ𑌼 இனகீரி நங் கெ𑌼ராளெ𑌼 நிச்செ𑌼 எ𑌼ட்னு ப𑌼ன்லமா, எ𑌼ன்ட𑌼ாட்டு தன் கெ𑌼ராளிய நெ𑌼ய்ரிப்பெ𑌼க𑌼ெ𑌼. பின ப𑌼ால் சமியெ𑌼 ஆசெ𑌼த𑌼ெ𑌼. தன் அண் த𑌼ப்புத𑌼ெ𑌼 தன் கர்க𑌼ஜிலி கெ𑌼ரெ𑌼ணோட𑌼 நிய்யெ𑌼 பெ𑌼ய்ட்டு கெ𑌼ராளிய நே𑌼ய்ராட்டு ப𑌼ன்ட𑌼 பீக𑌼ே அன்பெ𑌼னு பெ𑌼த𑌼்த𑌼ெ𑌼. அன் அண் தன் கெ𑌼ராளிய நோட𑌼்லயெ𑌼 ப𑌼ட்ல்ல போப்பெ𑌼த𑌼ெ𑌼. அன் பாத𑌼் ப𑌼ட்க்க போப்பெ𑌼ன் நிச்செ𑌼 பின தீரி அ ப𑌼ட்ல்லா இப்பெ𑌼ன கண்ட𑌼ாட்டு இத𑌼ெ𑌼 யன் கெ𑌼ரராளெ𑌼 தீரிமி அன்பெ𑌼னு ந்யன்தாட்டு, அப𑌼் ப𑌼ட்ல்லா போப்பெ𑌼த𑌼ெ𑌼. பாத𑌼் த𑌼ீர்க்க போப்பெ𑌼ன் பிலியெ𑌼 அள்ளிய கண்ட𑌼ாட்டு, பின பிலியெ𑌼 அள்ளி தெ𑌼ப𑌼்ப𑌼ெ𑌼 பெ𑌼ய்ட்டு நோட𑌼்ன் தன் கெ𑌼ராளெ𑌼 பிலியெ𑌼 அளோக்க இப்பெ𑌼ன கண்ட𑌼ெ𑌼த𑌼ெ𑌼. பின ஆ உட𑌼்க𑌼ெ𑌼ன் ஏ𑌼ய்ர் பெ𑌼ய்ட்டு கத𑌼்த𑌼ெ𑌼ல் தன் அண்ட𑌼ொட𑌼 பெ𑌼த𑌼்த𑌼ெ𑌼. பின அக𑌼ொட்டயாளு பிலியெ𑌼 இப்பெ𑌼 ஜாக்க பே𑌼செ𑌼க𑌼ெ𑌼. அல்லி தங் கெ𑌼ராளிய ப𑌼ுட்டாக்க பெ𑌼த𑌼ெ𑌼னு பிலியொட𑌼 இக𑌼ெ𑌼 கே𑌼ட்டெ𑌼க𑌼ெ𑌼. அல்க்க பிலியெ𑌼 நிங் கெ𑌼ராளிய கேக்ஙா ப𑌼ாட்டு குய்ட்னு பீக𑌼ோ அன்பெ𑌼னு பிலியெ𑌼 பே𑌼வெ𑌼த𑌼ெ𑌼. பின நவெ𑌼 நிங் கெ𑌼ராளிய மத𑌼ு மாய்ட𑌼்லயெ𑌼 பெ𑌼ய்யொட𑌼ெ𑌼த𑌼ெ𑌼மு எ𑌼ன்ட𑌼ெ𑌼த𑌼ெ𑌼. அன் ஆ மன்செ𑌼ன்ட𑌼ெ𑌼 ஆ ஜாக𑌼ெல் இத𑌼ெ𑌼னு தங் கீர்க்க எ𑌼ட்ன்காட்டு பே𑌼செ𑌼க𑌼ெ𑌼. தங் கீர்ல் பெ𑌼ய்ட்டு அக𑌼ொட்டயாளு நங் கெ𑌼ராளிய பிலியெ𑌼ப்பெ𑌼லித𑌼ெ𑌼னு காப்பத்தெ𑌼னு குய்ட்னு ப𑌼ன்ட𑌼ப்பெ𑌼லமா அன்பெ𑌼னு பெ𑌼த𑌼ெ𑌼க𑌼ெ𑌼. பின பின்பெ𑌼 நாளெ𑌼 எ𑌼ர்க𑌼ித𑌼ெ𑌼ஙா தன் கெ𑌼ராளிய குய்ட்னு ப𑌼ாட𑌼்லுஙா ப𑌼ெ𑌼ரி பிலியெ𑌼 இப்பெ𑌼 ஜாக்க பே𑌼செ𑌼க𑌼ெ𑌼. தன் அண்ட𑌼ெ𑌼 ப𑌼ுப்பெ𑌼னா உட𑌼்க𑌼ித்தி கண்ட𑌼ெ𑌼த𑌼ெ𑌼. அன் உட𑌼்க𑌼ித்தி பிலியோட𑌼 அண்ட𑌼ெ𑌼 ப𑌼ன்ட𑌼ொட𑌼ெ𑌼யுமு நிய்யெ𑌼 அதெ𑌼ர்க்க பெ𑌼ய்ர்க𑌼ாட்ல் பெ𑌼ய்ட்டு எ𑌼ர்ச்சி புட𑌼்செ𑌼னு எ𑌼ட்னோட𑌼ே, அன்பெ𑌼னு உட𑌼்க𑌼ித்தி பிலியோட𑌼 பெ𑌼த𑌼்த𑌼ெ𑌼. அன் பிலியெ𑌼 சிரிமி எ𑌼ன்ட𑌼ாட்டு பெ𑌼ய்ர்க𑌼ாட்டெ𑌼ஙா பே𑌼செ𑌼த𑌼ெ𑌼. பின பிலியெ𑌼 பெ𑌼ய்ர்க𑌼ாட்டெ𑌼ஙா பே𑌼செ𑌼ஙா ஆ உட𑌼்க𑌼ித்தி தன் அண்ட𑌼ெ𑌼 இசிரி பிலியெ𑌼 ப𑌼ார்க𑌼ுனு இப𑌼் துண்ட𑌼ிய திச்செ𑌼ல் காசெ𑌼னு எ𑌼ட𑌼்செ𑌼னிப்பெ𑌼க𑌼ெ𑌼. பின பிலியெ𑌼 எ𑌼ர்ச்சி எ𑌼ட்ன் ப𑌼ாட்டு ஆ உட𑌼்க𑌼ித்திப்பெ𑌼லி கொட்டெ𑌼ஙா ஆ உட𑌼்க𑌼ித்தி நிச்செ𑌼, எ𑌼ர்ச்சி ஏக்கிரி ஒட்டய அட்டெ𑌼த𑌼ெ𑌼. அட்டாட்டு மிந்த𑌼யா பிலிக்க யார்த்தெ𑌼னு நிச்செ𑌼 கொட்டெ𑌼த𑌼ெ𑌼. பின பிலியெ𑌼 பொட் நெ𑌼ர்த்தெ𑌼 நல்லய நிச்செ𑌼 தின்ட𑌼ெ𑌼த𑌼ெ𑌼. பின பிலிக்க மங் முர்ஜ்ஜெ𑌼த𑌼ெ𑌼. பின உட𑌼்க𑌼ித்தி தன்அண்ட𑌼ெ𑌼 ஒட்டயாளு சே𑌼ர்ஜ்ஜெ𑌼னு பிலிய எ𑌼ட்னு பெ𑌼ய்ட்டு ஒன் ம்யட்ல் கய்ட்டாட்டு அர்த𑌼்த𑌼ெ𑌼க𑌼ெ𑌼. பின அக𑌼ெ𑌼 காசெ𑌼னித𑌼ெ𑌼 இப𑌼் துண்ட𑌼ிய எ𑌼ட்ன் பெ𑌼ய்ட்டு பிலிய துட்னு பிலிய கென்க𑌼ாத𑌼ெ𑌼க𑌼ெ𑌼. பின பிலியெ𑌼 செ𑌼தெ𑌼னே𑌼செ𑌼த𑌼ெ𑌼. பின தன் அண்ட𑌼ெ𑌼 தன் கெ𑌼ராளிய குய்ட்னு கீர்க்க பே𑌼செ𑌼க𑌼ெ𑌼.
Literature Type
