கினிரி, பென்ட𑌼ி

<ஒன்ட𑌼ெ𑌼 ஈட𑌼்ல் கினிரி பென்ட𑌼ி எ𑌼ட𑌼்ட𑌼ாளு இத𑌼ெ𑌼க𑌼ெ𑌼. பின அக𑌼ெ𑌼ட𑌼்ட𑌼ாளு ஒன் ஜாக𑌼ெ𑌼ல் கத𑌼்த𑌼ெ𑌼ல் பெ𑌼ய்னிக்க பே𑌼செ𑌼க𑌼ெ𑌼. பின அல்லி பென்ட𑌼ி நல்லய பெ𑌼னிய கீவெ𑌼த𑌼ெ𑌼. கினிரி பெ𑌼ய்னியெ𑌼 கீல்த𑌼ி ஏரய்ரி இப்பெ𑌼த𑌼ெ𑌼. பென்ட𑌼ி சூட𑌼ெ𑌼 எ𑌼த𑌼்த𑌼ெ𑌼னு பெ𑌼ய்னியெ𑌼 கிஜொட்டெ𑌼த𑌼ெ𑌼. கினிரி பய்ய ப𑌼ாட்னு முள்காயெ𑌼 தின்ட𑌼ி ப𑌼ாட்னிப்பெ𑌼த𑌼ெ𑌼. நல்லய பெ𑌼ய்னியெ𑌼 கீவெ𑌼த𑌼ெ𑌼 ப𑌼ாட்டு பென்ட𑌼ி. பின மத𑌼ன்க்க நிச் தின்லாயெ𑌼 போப்பெ𑌼ன் பென்ட𑌼ி கிய்யெ𑌼 காலெ𑌼 கெத்தாட்டு போப்பெ𑌼த𑌼ெ𑌼. பின கினிரி பெ𑌼ய்னியெ𑌼 கீல்த𑌼்த𑌼ி ஈட்டு நிச்செ𑌼 தின்லாயெ𑌼 போப்பெ𑌼ன் மண்ணெ𑌼 மெத்தெ𑌼னு போப்பெ𑌼த𑌼ெ𑌼. ஆங் மய்ராட்டு கினிரி பென்ட𑌼ிக்க மிந்த𑌼ி பெ𑌼ய்ட்டு கினிரி தங் மொத𑌼ெ𑌼லலொட𑌼 இன்ட𑌼ெ𑌼, ெபன்ட𑌼ி பெ𑌼ய்னியெ𑌼 கிஜெ𑌼லமா எ𑌼ன்ட𑌼ெ𑌼த𑌼ெ𑌼. கினிரி பெ𑌼த𑌼ெ𑌼னு மொத𑌼ெ𑌼லாலி நம்ப𑌼ெ𑌼செ𑌼த𑌼ெ𑌼. பின பென்ட𑌼ி அல்க்க ப𑌼ண்ட𑌼ெ𑌼த𑌼ெ𑌼. பின நல் நிச்சிய எ𑌼ட்ன்ப𑌼ாட்டு கினிர்க்க கீர்ல் கூப்பெ𑌼செ𑌼னு கொட்டெ𑌼த𑌼ெ𑌼. பின பென்ட𑌼ிய ப𑌼ங்க𑌼ாட்ல் கூப்பெ𑌼செ𑌼னு கல் நிச்சிய கொட்டெ𑌼த𑌼ெ𑌼. ,ஆங் தன்ன எ𑌼ட𑌼்ட𑌼ு, மூறெ𑌼 நாளெ𑌼 கினிரி ஆங் தன்ன மய்ரொட்டெ𑌼த𑌼ெ𑌼. பின ஒன்நாளெ𑌼 கல்ஜெ𑌼னு, மொத𑌼ெ𑌼லாலி கத𑌼்க்க பே𑌼செத𑌼ெ𑌼. அன் பென்ட𑌼ி பெ𑌼ய்னியெ𑌼 கிஜித𑌼ெ𑌼ன மொத𑌼ெ𑌼லாலி நோட𑌼்செ𑌼த𑌼ெ𑌼. பின கினிரிய நோட𑌼்ன் கினிரி பய்யா ப𑌼ாட்னு முள்காய்யெ𑌼 தின்ட𑌼ி காலுக்க காலெ𑌼 எ𑌼ட்செ𑌼னு ஆட𑌼்சி ப𑌼ாட்னித𑌼்த𑌼ெ𑌼. பின நிச்செ𑌼 திம்ப𑌼ெ𑌼 சமியெ𑌼 ஆசெ𑌼ஙா கினிரி கத𑌼்க்க பெ𑌼ய்ட்டு மண்ணெ𑌼 எ𑌼ட்னு கிய்யெ𑌼 காலெ𑌼 ஒட்டய மண்ணெ𑌼 இத𑌼்த𑌼ாட்டு பே𑌼செ𑌼ன மொத𑌼ெ𑌼லாலி கண்ட𑌼ெ𑌼த𑌼ெ𑌼. பின பென்ட𑌼ி என்ட𑌼ெ𑌼 போப்பெ𑌼த𑌼ாங்க𑌼ி கிய்யெ𑌼 காலெ𑌼 கெத்தாட்டு நிச்செ𑌼 தின்லாயெ𑌼 பே𑌼செ𑌼த𑌼ெ𑌼. பின மொத𑌼ெ𑌼லாலி கீர்க்க பெ𑌼ய்ட்டு அக𑌼ெ𑌼ட𑌼்ட𑌼ாமெ𑌼ஙா நிச்செ𑌼 எ𑌼ட்னு ப𑌼ன்ட𑌼ெ𑌼த𑌼ெ𑌼. பின நல் நிச்சய பென்ட𑌼ிக்க கீர்ல் கூப்பெ𑌼செ𑌼னு பென்ட𑌼ிக்க கொட்டெ𑌼த𑌼ெ𑌼. பின கல் நிச்சிய கினிர்க்க ப𑌼ங்க𑌼ாட்ல் கூப்பெ𑌼செ𑌼னு கொட்டெ𑌼த𑌼ெ𑌼. அன்தனு மொத𑌼ெ𑌼லாலிக்க கினிர் ப𑌼ித𑌼்த𑌼ி க𑌼ொத்தாசெ𑌼த𑌼ெ𑌼. பின அக𑌼ெ𑌼ட𑌼்ட𑌼ாளு நிச்செ𑌼 தின்தித𑌼ெ𑌼செ𑌼த𑌼ெ𑌼. மொத𑌼ெ𑌼லாலி கினிரிய யார்தெ𑌼னு கினிரொட𑌼 மொத𑌼ெ𑌼லாலி நிய்யெ𑌼 இன்னத்தெ𑌼ர் நாளெ𑌼 யனிய யாமத்தெ𑌼னு இத𑌼்த𑌼ெ𑌼. இங்க𑌼ாசனி ஈங்க𑌼ிசிரி கிஜாட்டு , அன்பெ𑌼னு ப𑌼ித𑌼்த𑌼ி பெ𑌼த𑌼ெ𑌼னு கொட்டெ𑌼த𑌼ெ𑌼. பின கினிரி மொத𑌼ெ𑌼லாலியொட𑌼 மாப்பெ𑌼 கே𑌼ட்டெ𑌼த𑌼ெ𑌼. நவெ𑌼 கித𑌼்த𑌼ெ𑌼 தப்பெ𑌼மு, யனிய மன்சாக𑌼ே. பின மொத𑌼ெ𑌼லாலி கினிய மன்செ𑌼செ𑌼த𑌼ெ𑌼. பின கினிரி பென்ட𑌼ி எ𑌼ட𑌼்ட𑌼ாளு ஒன்ட𑌼ய பெ𑌼ய்னியெ𑌼 கிஜாட்டு கினிரி பென்ட𑌼ி எ𑌼ட𑌼்ட𑌼ாளு ஒப்பத்தெ𑌼ஙா பெ𑌼ய்னியெ𑌼 இத𑌼ெ𑌼செ𑌼ஙா அக𑌼ெ𑌼ட𑌼்ட𑌼ாளு ஒன்ட𑌼ய கீர்க்க பே𑌼செ𑌼க𑌼ெ𑌼. பின பின்பெ𑌼 நாளெ𑌼 எ𑌼ர்க𑌼ித𑌼ெ𑌼ஙா அக𑌼ெ𑌼ட𑌼்ட𑌼ாளு பெ𑌼ய்னிக்க ப𑌼ாட்டு ஒன்ட𑌼ய பெ𑌼ய்னியெ𑌼 கிஜாட்டு , மத𑌼ன்க்க ஒன்ட𑌼ய நிச்செ𑌼 தின்லாயெ𑌼 பே𑌼செ𑌼க𑌼ெ𑌼. பின நிச்செ𑌼 தின்ட𑌼ாட்டு ப𑌼ாட்டு பெ𑌼ய்னியெ𑌼 கிஜாட்டு ஒப்பத்தெ𑌼ஙா எ𑌼ட𑌼்ட𑌼ாளு ஒன்ட𑌼ய கீர்க்க பே𑌼செ𑌼க𑌼ெ𑌼.